Studia na Hulanda

ta kuminsa ku un bon preparashon

Studia na Hulanda » Moneda i klima

Na Hulanda for di 2002 e moneda ofisial ku ta wordu huza ta Euro(€). Prome ku esei e florin Hulandes tabata wordu huza. E Euro ta wodu huza na tur e 17 paisnan ku ta kai bou di paisnan Eropeo. Na Hulanda den mayoria pakusnan i tiendanan bo por paga ku sèn kèsh of paga ku bo karchi di banko (pin).

Na Hulanda e klima ta konsisti di kuater temporada (seizoen) ku ta winter, lente, zomer i herfts.
Den winter e temperatura ta bastante abou kompara ku e otro temporadanan ku ta pone ku ta hasi bastante friu ku sneu, hagel i asta yobida. E friedat por yega asta bou di 0 grado. Den e temporada aki e dianan ta mas kortiku dor ku solo ta baha mas trempan i e nochinan ta dura mas largu. E temporada di winter aki ta kuminsa den desèmber te ku febrüari.

Lente ta e temporada kaminda bida nobo ta kuminsa. Esaki ta ensera ku flornan ta krese, palunan ta kuminsa haña nan blachinan bèk i yunan di bestianan ta nase. E temporada aki ta kuminsa den mart te ku mèi. Den e temporada aki e temperatura ta kuminsa subi ku ta pone un fin na e winter, i ta prepara pa yama zomer bon bini. E temperatura den e temporada aki no ta hopi friu i tòg no sufisiente kayente i ku algun yobida.

Zomer ta e temporada ku hopi hende ta warda riba dje, despues di a pasa un temporada den friu bastante largu. Esaki ta un temporada ku hopi ta spera pa por disfruta di e solo kayente i pa bai ku fakansi. Zomer ta kuminsa yüni te ku augustes. Den zomer e temperatura por ta hopi kayente i asta tin biaha bientu ta supla hopi abou ku bo ta sinti hopi sofoka (benauw). Na e otro banda, bo por eksperensha hopi yobida den e temporada aki. E klima den e temporada aki nunka ta hopi sigúr. Bo por eksperensha un siman di awaseru i despues un siman sumanente kayente. Pues e no ta garantisa bu un zomer 100% tur biaha. Pesei ta di importansha pa keda altante di pronostiko di tempu (weerbericht).

Herfts ta kuminsa sèptember te ku novèmber. Den e temporada aki tur blachi bèrdè ta kuminsa bira maron i ta kuminsa kai for di e palunan. E temporada aki awa ta kai bastante i asta bo por eksperensha algun mal tempu. Esaki ta nifika ku e zomer ya a yega na su fin i ya ta preparando pa winter.
Den herfts tin hopi bientu friu ta supla den e temporada aki i nochi ta kuminsa dura mas largu, dor ku solo ta kuminsa baha trempan. Mas den oktober bo ta sinti e influensha di herfts mas tantu.

  • ShareShare on FacebookShare on LinkedInShare on Google+Tweet about this on Twitter
  • Bo tin pregunta?

    Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

    Tuma kontakto ku SnH
    Studia na Hulanda

    Studia na Hulanda