Studia na Hulanda

ta kuminsa ku un bon preparashon

Studia na Hulanda » Kosnan pa regla ora bo yega Hulanda

1c0ae2205709722b62e843abc0471a55_L

Kiko mi tin ku regla ora mi yega Hulanda?

Ora ku bo yega Hulanda, tin algun kosnan ku bo tin ku regla asina bo yega. I tambe segun dianan ta bai, mas kos ta bira relevante pa regla sea pa ku bo bida personal, komo studiante i komo suidadano.
Studia na Hulanda a traha un lista di e kosnan ku siguramente bo mester regel ora ku bo yega Hulanda.

1. Inskribí na gemeente
Asina ku bo yega Hulanda, ta bon pa bo bai inskribi bo mes mesora na e gemeente ku bo ta bai biba. Esaki tin di haber tambe pa bo por haña bo burgerservicenummer (number di indentidat). E number aki bo méster di dje pa por kaba di regla bo kosnan na Hulanda, manera na banko i seguro.

2. Habri un kuenta di banko
Na bankonan komo studiante bo por habri un kuenta speshal pa studiante. Korda bai ku bo paspoort pa por indentifiká bo mes. Korda ku “rood staan” ta un lening ku bo tín ku paga bèk.

3. Kaba di regel bo inskripshon na skol
Sí ahinda bo tin kosnan di reglá na skol, hasi esaki mas lihe ku ta posibel. Ya bo no ta kore e risiko di kuminsa skol mas lat dor ku bo inschrijving no ta kompletu. Kòrda bai ku 2 pasfoto pa si akaso bo mester entrega esakinan pa bo collegekaart.

4. Firma kòntrakt di bo kamber
Kòrda firma e hürkòntrakt promé bo bai den bo kamber. Sòru pa lesa e kòntrakt bon! Prínsipalmente e lèternan chikí. Bai huntu ku un persona mas pa huntu boso por lesa e kòntrakt. Huntu boso lo porne èkstra atenshon riba loke tin skirbí. Pone bon atenshon riba e huisregels i mantene bo mes na esakinan.

5. Muebla bo kamber
Na momentu di muebla bo kamber, sòru pa bo tin e meubelnan prinsipal. Esaki nan ta ensera: kama, kolchon (matras), dekbed, bureau, stul, ijskast chiki, lus i kortina, heru di strika, tabla di strika i un kashi. Pa spar sèn bo por kumpra meubel (nó kolchon) di segunda mano na kringloop (luga ku ta bende kos segunda mano). Òf tin biaha den studentenflat mes tambe nan sa pone ku studiantenan ta bende nan kosnan òf duna.

6. Hasi bo promé boodschap
Despues ku bo a kaba di muebla bo kas, kòrda yena bo ijskast ku kumindanan saludabel. Ora bo ta bai hasi boodschap, pone bon atenshon na e fecha di vensementu di e produkto. No kumpra hopi kos si bo sa ku bo no ta bai husa nan prome ku e fecha vense. Si bo no tin ijskast ahinda, kumpra algun kosnan di bleki, paki i bòter. Algun frutanan bo por laga pafo, pero no ta tur bèrdura bo por laga pafó. Pa bo por kome bèrdura fresku tur dia i bo no tin ijskast ahinda, kumpra esakinan pa dia. Ora ku tin aanbieding, un biaha mas pone atenshon riba e fecha di venesementu. Tambe den aanbieding bo por haña basta kos na un prèis redusí i tin biaha kumpra 2 paga 1. Algun supermarket ku ta barata ta: Lidl, Aldi, Bas v/d Heijden i Jumbo.

7. Kumpra simkaart
Sí bo tin un telefòn kaba, loke bo mester ta djis e chip (simkaart) pa bo tin un number di Hulanda ku bo por risibi i hasi yamada kune. Esaki nan por wòrdu kumpra na diferente luganan ku ta bende telefòn i artikulonan pa telefòn. Mayoria biaha e telefòn ku bo ta bin kune for di Antias, ta traha tambe na Hulanda. Ta si esaki no ta e kaso, bo por kumpra un telefòn barata pa kuminsa kune.

8. Aplika pa seguro di dòkter
Na Hulanda tin paketenan di seguro speshal pa studiantenan i tur hende ta obligá na sera un seguro di dòkter asina nan schrijfin na gemeente. Si bo djis buska riba internet “vergelijk verzekering” bo por haña un bista kiko ta mas barata i kuminiente pa abo. Wak hopi bon kiko tur e seguro aki ta kubri. Via di e website di e kompania di seguro mes bo por aplika.

9. Inskribí na un dòkter i dentista
Tur studiante tin derechi di risibi un bon kuido mediko. Un bon konsentrashon na skol ta kuminsa ku un bo salud. Pa por risibi e kuido mediko, ta bon pa bo inskribi bo mes na un dòkter di kas i un dentista djis banda di bo kas. Dikon banda di bo kas? Paso e ta mas fasil pa bo yega. Dikon inskribi na un dokter? Pa den kasonan di malesa bo por akudí bo dòkter i tambe den kasonan di emergensha for di ora di trabou, semper tin un number kaminda bo por alkansa bo dòkter pa kuido mediko.

10. Aplika pa zorg i huurtoeslag
No ta tur studiante por bin na remarke pa un zorg i huurtoeslag. Esaki ta depende ki tipo di kas/kamber bo ta hür (partikulier) i tambe na kua kompania bo tin seguro di dòkter. Sí bo ke sa sigur si bo ta bin na remarke pa zorg i huurtoeslag? Informa na prome luga na bo doño di e kas/kamber i tambe na bo kompania di seguro si bo por aplika pa esaki. Na di dos luga bel belasting dienst (www.belastingdienst.nl) pa informa si bo ta bin na remarke pa zorg i huurtoeslag.

11. Kumpra un tijdelijk ov chipkaart
Den e prome simannan ku bo ta na Hulanda, siguramente bo tin basta kos di regla promé ku skol kuminsá. Mirando ku ahinda lo bo no a risibi bo studenten ov-kaart, bo ta bai tin mester di un tijdelijke ov-chipkaart. Pesei ta bon pa bo tin un suma di mas o menos €130, – un banda pa por kubri e gastu di transporte publiko.
E ov- chipkaart aki bo por kumpra na un lokèt di (trein)NS òf RET, ku bo por husa den tur transporte publiko.
Tip: Pone un suma di max €20,- riba e karchi. Esaki pa si akaso bo pèrdele, bo no pèrdè un suma grandi riba dje.

12. Luga pa laba paña
Informa den bo studentenflat ku tin un wasruimte kaminda bo por laba paña. Si esaki ta e kaso, mayoria biaha nan ta bende muntjes pa laba paña i bo mes tin ku sòru pa bo habon i wasverzachter. Si no tin wasruimte den bo gebouw, informa unda den bo buurt tin un wasserette.
Tip: No warda te ora túr bo pañanan bira sushi pa laba nan. Esaki hopi biaha ta hiba ku studiantenan ta gasta sèn na paña nobo sín tin mester.

13. Sí por, wak un laptop òf computer
Pa skol bo ta bai tin mester sigur di un laptop òf computer. Na skol tambe tin e fasilidat di hasi uso di computer. Pero di eskperensha, mayoria biaha tur e computernan aki ta bezet. Ku bo ta keda kana rònt basta ratu pa por haña un computer pa huza. Si bo tin un di bo mes ta muchu mas fasil. Asta ora bo ta na kas, bo por subi riba e website di skol, login, pa wak si un lès a kai afó. Ya bo no ta bai skol trempan pòrnada.
Si bo no por kumpra un laptop òf computer ahinda, purba wak na ki momentu ta mas trankil na skol ku bo por hasi uso di computer di skol mes.
Tip: Ora bo ta bai kumpra laptop òf pc, bai ku un hende ku tin saber di computer, pa bo por kumpra algu segun bo saku i di kalidat.

14. Kumpra material pa skol
Un bon komienso di skol ta kuminsa ku un bon preparashon. Sea prepara pa por kuminsa e aña eskolar nobo. Korda kumpra schrift, pen, marker, agenda, etc pa por kuminsa kune. Algun luganan ku bo por haña kos di skol barata ta: Action i Hema.


ShareShare on FacebookShare on LinkedInShare on Google+Tweet about this on Twitter

Bo tin pregunta?

Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

Tuma kontakto ku SnH
Studia na Hulanda

Studia na Hulanda