Studia na Hulanda

ta kuminsa ku un bon preparashon

Studia na Hulanda » Bibienda

Na Hulanda mayoria studiante ta biba op kamer òf den un studio. Op kamer ta literalmente ku bo ta biba den ún kamber so i tin ku komparti baño i kushina ku otro studiantenan ku ta biba riba e mesun unit ku bo. E kamber por ta mas chiki di loke bo a kustuma kune. Ora nos ta papia di studio, bo tin un kamber i den e kamber aki bo tin bo baño i kushina aden. Pues bo no tin ku komparti nada ku otronan. E kambernan i studionan aki bo por haña den e asina yamá studentenflat(gebouw). Tambe tin e posibilidat di hür kamber privá (partikulier). Esaki ta un pèrsona ku tin un kas of pand ku diferente kamber den dje i ta hür esaki nan ku studiantenan. E prèis di kambernan i studio por varia entre € 300, – i € 600, – (sin huurtoeslag) i ta inkluí awa, gas i koriente. I asta tin biaha tv i internèt (no tur kaminda). Pa Kambernan privá, mayoria biaha bo tin ku paga dos biaha e prèis di hür na komienso di e hür. Esun ta prèis di bòrg, e otro ta hür di e prome luna.

Pa haña un kamber na Hulanda no ta asina fasil mas. Prinisipalmente den suidatnan grandi esaki por ta un problema. Pesei ta rekomendabel pa buska un bibienda mas pronto ku ta posibel promé ku bo yega Hulanda. Sigur 1 aña adelantá. Na momentu ku bo haña un bibienda ta bon pa bai ku un hende mas huntu ku bo, pa wak e kamber/studio. Esaki pa tin èkstra bista riba loke ku sea tin ku wòrdu drecha den a kamber, pa hasi preguntanan enkuantu e bibienda, hür i huisregels i tambe pa tira èkstra bista riba loke tin skirbí den e kòntrakt.

Na momentu ku bo bai wak un kamber i bo no ke e kamber; pensa bu hopi bon prome ku bo keda sin tumé. Evalua bon kiko ta e motibunan balido pa kual bo no ke tuma e kamber. Kòrda ku si bo laga e kamber ei pasa bu bai, e por duel bo despues, dor ku por dura bo muchu mas tantu pa haña un otro.
Si bo a haña un kamber, kòrda tuma tempu na lesa e kòntrakt hopi bon promé bo firma. Asta e lèternan chiki ta di importansha. Mayoria kòntrakt di hür ta un aña kòntrakt òf pa te ora ku bo ke mudá.

Kambernan ku bo ta hür via di un fundashon di kas, bo por bin na remarke pa ‘huurtoeslag’. Huurtoeslag ta un kompesashon den bo hür di kas. Pues e ta un bedarg ku bo ta risibí di belastingdienst pa yuda bu paga bo hür di kas. Depende bo entrada i bo prèis di hür, ta detèrmina si bo ta bin na remarke pa huurtoeslag.

  • ShareShare on FacebookShare on LinkedInShare on Google+Tweet about this on Twitter
  • Bo tin pregunta?

    Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

    Tuma kontakto ku SnH
    Studia na Hulanda

    Studia na Hulanda