Studia na Hulanda

ta kuminsa ku un bon preparashon

Studia na Hulanda » Bida di studiante

Desafioso
E bida di studiante na Hulanda ta unu hopi desafioso. Na prome luga e ta desafioso dor ku bo tin ku hasi tur kos bo mes. Ta aun mas desafioso si bo no a kustuma ku e bida independiente. Esaki tin di haber ku responsabilidat i disiplina. Abo ta esun ku al final tin ku tuma desishonnan pa ku bo bida i bo estudio i su konsekuenshanan. E ta desafiso tambe, dor ku bo ta bai tin di haber ku un país i kultura diferente. Praktikamente tur kos lo ta diferente pa bo i ku lo bo tin ku bai kustuma ku esakinan.

Banda di esakinan, e bida di studiante na Hulanda ta unu hopi dushi i leuk. Bo ta kuminsa ku un bida nobo, bo por richt bo kamber in manera bo ke, bo ta sera amistatnan nobo, bo por hasi uso di tur e fasilidatnan (p.e. studentenkorting)  ku Hulanda ta ofrese na studiantenan. Bo por sali i keiru rond Hulanda i den Eropa. E bida di studiante na Hulanda por ta unu hopi dushi, basta bo keda ku bo meta na bista i gosa na un manera sano.

Libertat
Asina un hoben tende di Hulanda, prome kos ku e ta pensa ta “libertat”. Libertat ta un di e motibunan kual hobennan ta skohe pa bai biba na Hulanda. Pa nan por sali for di kas di nan mayornan i biba un bida na nan mes manera. Esaki ta un motibu robes pa skohe pa biba na Hulanda. Korda ku kiko bo hasi sea bon òf malu, bo tin ku karga e konsekueshanan. Hulanda ta ofrese hopi posibilidat i fasilidatnan i mester hasi bon uso di nan na un manera korekto.
Hulanda no ta ofrese bo libertat. Ta e bida ku bo ta bai biba sin bo mayornan, ta pone ku bo ta bai tin mas libertat pa hasi bo propio eskohonan. Pesei sea sabí i konsiente den loke bo ta hasi òf keda sin hasi durante di bo bida na Hulanda.

Integrá
E bida di studiante na Hulanda ta unu otro for di loke bo a kustuma kune na bo país. E ta rekerí ku bo tin ku prepara bo mes mentalmente pa e kambio di bida aki na Hulanda i ta habrí pa bo por integrá na Hulanda tambe. Esaki ta insera ku bo tin ku prepará bo mes, ku bo ta bai tin di haber ku otro kultura, otro idioma i klima i un bida independiente. Pues bo ta bai tin ku siña e idioma i di e bida Hulandes.
Algu ku siguramente bo tin ku bai kustuma kune ta, e idioma. E Hulandes ku ta wordu papia na Hulanda, no ta esun ku bo a kustuma kune na skol for di kaminda bo ta bini. Hopi ta wordu sopresá pa esaki i ta haña ku nan tin ku pone èkstra atenshon na esaki pa siña e Hulandes korekto i na un nivel mas haltu.

Na momentu ku bo kaba di yega Hulanda, bo por sinti bu fasiná dor di e país, e ambiente, naturalesa, e kumindanan, ètc. Tur kos ta mustra di ta kolo di rosa. Despues di e pasa dor di e fase aki, ta bini e momentu ku bo ta bai realisa bo mes, ku bo no ta na bo mes país mas, ku bo ta na un luga stranhero i ku enberdat bo ta bai kuminsa un bida nobo sin bo mayornan. Bo por konfronta bo mes ku e barera di lenguahe, e hendenan mes, e kuminda, e sistema di trafikashon, ètc. Den e momentu aki (depende na e pèrsona) bo por tin di haber ku ansiedat, miedu, soledat i insiguridat. Den e fase aki, ta di importansha pa tin sosten di mayor (nan) i otro nan. Purba na sosialisa ku otro nan dor di forma un grupo di amistat kaminda un ta sostene otro i hasi kosnan leuk huntu.
Despues di e kustuma ku e kultura i tur e kosnan nobo ku bo a eksperenshá, bo ta kai den e rutina di bida i ya tur kos ta kuminsa parse normal pa bo. Despues bo por ta kapas di partisipa kompletamente den e sosiedat.

Algu mas ku lo bo tin ku kustuma kune, ta e “cultuurshock”. Cultuurshock bo ta eksperensha esaki na momentu ku bo eksperensha algu ku ta fuera di loke bo a kustuma kune den bo propio kultura. Esaki por hala bo atenshon di un manera ku e ta spanta bu. Algu ku bo no por imagina bu. Un ehèmpel di loke bo por eksperensha diferente, ta na momentu bo mira dos hende muhe òf hende homber ku man tene. Sí, homoseksualidat ta algu masha normal na Hulanda. Esaki ta dor ku e kultura Hulandes, ta duna bu e libertat di bo ekpresa loke bo ta pensa, sinti i kere den dje. Pues sea alerta di loke bo por eksperenshá, ku no ta loke bo a kustuma kune.

Rekreá/sosialisá
Na Hulanda tin bastante parke di atrakshon ku bo por bishita. Luganan ku ta leuk pa bishita nan den grupo i tambe tin kaminda ku bo por bai bo so. Na algun di e luganan aki, bo por haña un rebaho komo studiante riba e prèis di entrada.
Banda di esaki nan tin diferente luganan manera museo, bioscoop, parke, zwembad ètc., ku bo por bishita na Hulanda durante di henter aña.

Un biaha mas nos ke pone énfasis riba e parti di sosialisá ku otronan. Dikon esaki ta di importansha? Dor ku hopi studiante ku bin biba na Hulanda, ta sinti falta di nan amistadesnan ku nan a laga atras i nan mayornan. Hopi ta eksperensha heimwee i sufri di soledat. Dor di tur esakinan, nan no por focus mas riba nan meta i estudio i ta sinti e gana di bai nan país bèk. Un tep ta, pa forma bo grupo di amistadesnan, soru pa boso tin kontakto regular ku otro, prinsipalmente den e prome fasenan di e bida nobo na Hulanda. Den temporada di winter, solo ta baha hopi trempan i nochi ta dura largu, anto esaki ta un temporada ku algun personanan ta sufri di depreshón. Den e temporada aki tambe ta dianan di fiesta. Siguramente lo bo sinti falta di bo mayornan. Sali i rekrea ku bo amistadesnan i hasi boso propio aktividat i un lo sóstene i algera otro.

  • ShareShare on FacebookShare on LinkedInShare on Google+Tweet about this on Twitter
  • Bo tin pregunta?

    Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

    Tuma kontakto ku SnH
    Studia na Hulanda

    Studia na Hulanda