Studia na Hulanda

ta kuminsa ku un bon preparashon

Studia na Hulanda » Estudio Eksitoso

Siguramente tur studiante ta desea di tin eksito den nan estudio. Esaki ta un di e metanan prinsipal kual bo tin ku pone bo dilanti i pa alkansa esaki. Kon mi por tin eksito den mi studio? Hopi ta puntra. E punto mas prinsipal ta, pa pone pa bo mes kiko bo ke alkansa. Den e kaso aki, ta bo estudio.

1. Ta sigur di loke bo ta bai hasi. Duda, ta un señal ku bo no tin sigur di loke bo ke i esaki ta stroba bu di tin eksito den bo estudio. Ta sigur di loke bo a skohe pe i bai pé. Skohe pa algu ku bo ta gusta hasi i tin goso den dje.

 

2. Semper keda ku bo meta na bista. Den tur loke bo ta hasi, korda kiko ta bo meta i kita for di loke tin mal influensha ku ta stroba bu di logra esaki. Keda ku bo bista figá riba bo meta i tin un mente positivo di “ku bo ta logra bo meta”. Bo por asta pinta òf skirbi esaki riba papel i pone un kaminda ku bo por miré konstantemente. Esaki pa korda bu riba bó meta i ku ta duna bo un PUSH pa hasi esaki!

 

3. Dedika tempu den bo estudio. Bai responsabel ku bo tempu. Traha bo huiswerk na tempu, entrega bo tareanan na tempu. Kuminsa siña pa bo tentamen trempan. Un siman promé ku bo deadline no ta sufisiente. Hasi un planiashon di tur bo tareanan di skol ku bo tin ku hasi, pa bo por ta na tempu ku esakinan. No laga loke bo por hasi awe pa mayan. Esaki ta evita bo hopi strès.

 

4. Soru pa bo tin sufisiente informashon pa por studia. Esaki ta nifiká ku bo tin ku ta presente na e lèsnan i college si bo ke tin sufisiente informashon di e materia pa por studia i traha bo tareanan. Si bo no tin e materia bon dominá, lo bo nó tin eksito den esaki tampoko.

 

5. Hasi pregunta/pidi yudansa. Si bo no ta kompronde algu di un materia, no duda di hasi pregunta of aserka e dosente. Si bo no sa algu, e dosente no sa te na ora bo mes aserkele. Si esaki no ta e kaso, e sí ta sigui bai ku e lès i abo ta keda pegá den e materia. Kòrda ku e dosente tei pa yuda bo. Pues hasi bo preguntanan libremente, paso esaki tin benefisio pa bo mes.
Tambe bo por pidi yudansa serka konosinan òf otro studiantenan ku tin bon dominio di e materia i ku ta kla pa yuda bo.

 

6. Studiemaatje. Tin ún (òf mas) kopañero di estudio pa studia huntu kune. Un ta motiva i yuda otro.

 

7. Lès di Hulandes. Ta di importansha pa volg un lès di Hulandes, si bo no ta domina esaki sufisiente bon. Na mayoria skolnan, nan ta ofresé lès di Hulandes (ínforma esaki). Sí esaki no ta e kaso, via di Nti i LOI tambe bo por volg kursonan di Hulandes. Riba merkado tin un buki speshal pa siña Hulandes ku yama: “Vlekkeloos Nederlands, Taalbeheersing B2”. Esaki ta un zelfstudieboek (bo ta studie riba bo mes).

 

8. Zelfstandig studeren. Na hbo i universidat, niun dosente no ta kore tras di studiantenan pa nan hasi na tareanan i siña pa tentamen. Tur studiante ta riba nan mes i ta responsabel pa nan resultado di nan estudio. No verwacht ku niun hende ta bai push bo pa hasi bo parti. Tambe trahamentu den grupo, tur miembo di e grupo ta verwacht ku kada ken ta hasi nan parti manera mester ta. Pues semper hasi bo parti, paso e ta bon pa bo mes!

 

9. Stage. Na mbo i hbo stage ta hunga un ròl esensial den bo estudio. Na momentu ku bo sa den ki temporada bo tin ku kore stage, ta rekomendabel pa buska stage trempan. Debí ku mayoria skolnan su temporada di stage ta mesun pareu. I luganan di stage ta yena lihé. Pa bo por ta sigur di un luga di stage, kuminsa buska stage minimal 5 luna adelantá.

 

10. Hasi bo skol bo trabou. No laga e sistema di bida na Hulanda i e bida sosial desvia bo for di bo estudio.   Si tin álgu ku nó mester wordu neglisha, ta bo skol. Si bo no kaba bo skol, bo ta haña bu tin ku bai traha hopi duru na trabou pa djis gana un salario minimo. Un berdadero studiante ta soru pa e tin su mes bukinan, tin un luga apropia pa studia, i tin su materialnan nesesario semper huntu kune. Loke ta destrahí bo, tuma akshon dor di keda leu for di esaki. Soru tambe pa bo tin goso den bo estudio!

 

11. Tuma un break. Ta hopi importante pa dedika sufisiente tempu na bo estudio. Pero loke tambe ta importante, ta pa plania momentunan di break. Esaki ta insera momentunan pa otro aktividatnan, ku ta pone bu relaha i relax pa duna e mente sosiegu. Esaki ta di hopi importansha espesialmente den momentu nan di hopi tenshon. Korda sí, pa tin un bon balansa den bo momentu di estudio i break.

 

12. Kome i biba salú. Un sistema di bida saludabel, ta hiba na un bon konsentrashon i ta preveni malesa. Kome kumindanan bon balansa (ku fruta i berdaura) i hasi ehersisio minimo 30 minüt pa dia. Esakinan tambe ta kontribuí na un bon prestashon.

 

13. Evalua. Evaluá bo eksitonan i bo fayonan. Bo por siña di bo fayonan, basta bo rekonose ku ta fayo nan ta. Loke tabata un eksito, sigui dal bai ku esaki. Evualua tambe ki ora ta bo momentunan ku bo ta studia mas miho i ki ora no.

 

Bo ta kla pa hasi tur bo esfuerso pa bo estudio?!

  • ShareShare on FacebookShare on LinkedInShare on Google+Tweet about this on Twitter
  • Bo tin pregunta?

    Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

    Tuma kontakto ku SnH
    Studia na Hulanda

    Studia na Hulanda