Studia na Hulanda

ta kuminsa ku un bon preparashon

Studia na Hulanda » Finansas

Komo studiante, bo ta risibi studiefinanciering komo un entrada pa por paga skol, kumpra buki i asta algun kosnan personal. Loke ta un echo ta, ku e studiefinanciering no ta yega tur biaha pa por kubri tur bo gastunan. Komo studiante bo tambe tin ku kumplí ku bo debernan di paga hür di kamber, skol, buki, seguro, kuminda, telefòn, ètc. Un solushon pa por tin èkstra entrada ta dor di buska un trabou. Un salario banda di bo studiefinanciering semper ta yuda pa bo por kubrí bo gastunan i asta hasi òf kumpra algu leuk pa bo mes.
Otro solushon ku hopi studiante ta komprometé nan mes kuné ta e asina yamá “Rood staan”. Rood staan ta na momentu ku bo duna bo banko pèrmit pa subi e límite di bo kuenta ku èkstra sèn. Esaki ta un otro forma di fiansa. Hopi studiante no ta na altura ku esaki ta un fiansa. Bai den rood ta sumamente atraktivo i fasil pa apliká.

Na momentu ku bo tuma e fiansa aki, bo tin ku paga interes tur luna. E pèrsentage di interes ku bo tin ku paga ta depende na e kantidat di sèn ku bo ke bai den rood kuné. E kantidat di sèn ku bo por bai den rood kune ta for di €500,- te ku €5000, – komo studiante. Por ehèmpel, si bo tin €500,- riba bo kuenta, i bo aplíka pa bai den rood ku €1000,- …bo ta haña €1000,- riba bo kuenta plùs ku bo €500,- ku bo tin kaba, ta suma €1500,- riba bo kuenta. Esaki ta nifiká, ku e €1000,- ta un fiansa ku bo tin ku paga bèk.
Ta konsehabel pa evitá di aplíka pa bai den “rood” sin tin mester. Esaki pa no komprometé bo mes ku fiansa ku bo ta bai keda mará na dje i ta kosta bu mas sèn.

Tur studiante por haña nan ku un luna ku nan no tin sén pa kubrí nan gastunan. Pesei ta bon pa sa kon bo ta dil ku bo entrada i bo gastunan. Tambe korda spar. Sí bo tin sèn di spar, bo por husa esaki pa por kubrí loke bo mester paga ahinda. No gasta mas di loke bo ta haña, esaki por hinka bo den problema finansiero. Pesei ta konsehabel pa kuminsa spar bo sèn for di promé ku bo bin Hulanda. E sèn aki semper por spar bo més for di problema finansiero. Pesei e yama tambe “spaargeld”.

Loke ta di sumamente importansha ta, traha un presupuesto (budget) pa bo tin un mehor bista di bo entrada i bo gastunan. Si bo sa kiko bo entrada ta, bo tin un mehor bista di kiko bo por i kiko bo no por kubri.
Nota den bo presupuesto tur bo gastunan mensual i soru pa kumplí ku esakinan. Tambe pone un kantidat di sèn fiho tur luna pa bo spar i kumplí ku esaki tambe.
Na momentu ku bo desvia for di bo presupuesto i husa bo entrada pa algu otro i no pa bo gastunan mensual, kòrda ku e konsekuensha ta bini pa bo mes.
Gastunan ku semper mester wordu pagá promé ta bo hür, skol i seguro. Kòrda ku bo mester tin un dak riba bo kabes, bo tin ku sigui bo estudio i den kasonan di malesa, bo por bishita un dòkter i tuma bo remedinan sin gastunan èkstra.

Na momentu ku bo no kumplí ku bo gastunan mensual manera, hür, seguro òf algu otro, bo por haña bu ku gastu nan èkstra. Por ehèmpel gastunan di deurwaarde. Na momentu e kompania no haña pago di bo, despues di a manda un rekordatorio, e ta laga deurwaarde atende ku bo debe. Esaki ta nifika mas gastu riba e lokual ku bo mester a paga na e kompania. Pesei studiante, evitá di hinka bo mes den problema finansiero. Esaki ta hasi daño tambe na bo salud, dor ku bo no por drumi ni konsentra pa motibu di debe i bo por kai den depreshon. Pesei un biaha mas ta importante pa díl ku bo sèn na un manera responsabel

  • ShareShare on FacebookShare on LinkedInShare on Google+Tweet about this on Twitter
  • Bo tin pregunta?

    Pa kualke pregunta tokante estudio òf preparashon pa bai biba na Hulanda, tuma kontakto ku nos libremente.

    Tuma kontakto ku SnH
    Studia na Hulanda

    Studia na Hulanda